A Comunidade Terapéutica «As Cernadas» acolleu a sinatura dun novo convenio coa Axencia Galega da Calidade Alimentaria, que permitirá desenvolver durante 2026 accións formativas en horticultura, fruticultura e outras materias vinculadas ao medio rural.
O 29 de setembro de 2026, a Comunidade Terapéutica «As Cernadas» de Proxecto Home Galicia foi escenario da sinatura dun novo convenio de colaboración coa Axencia Galega da Calidade Alimentaria (AGACAL), organismo dependente da Consellería do Medio Rural da Xunta de Galicia.
O acordo foi subscrito polo director de AGACAL, Martín Alemparte Vidal, e pola directora de Proxecto Home Galicia, Ofelia Debén Rodríguez, e contempla unha achega de algo máis de 27.776 euros destinada a financiar accións formativas ao longo de 2026.
O obxectivo do convenio é facilitar formación en materias vinculadas á actividade agraria e á silvicultura, especialmente naquelas áreas que poidan ofrecer oportunidades de futuro no ámbito do emprego rural. En Proxecto Home Galicia, esta colaboración concrétase en actividades dirixidas ás persoas en tratamento, cunha clara orientación cara á adquisición de competencias útiles para a súa posterior inserción sociolaboral.
A formación inclúe contidos teóricos e prácticos sobre horticultura, fruticultura, cultivos intensivos baixo abrigo, instalacións para horta, técnicas de rega, fertilización en invernadoiros e compostaxe. Todo iso intégrase de maneira compatible coas esixencias propias do proceso terapéutico.
A xornada permitiu tamén coñecer de preto o traballo que se desenvolve en «As Cernadas». Durante unha chuviosa mañá de outono, o director de AGACAL percorreu as instalacións da Comunidade Terapéutica, especialmente as zonas de horta e invernadoiros, onde puido comprobar a produción existente e conversar co responsable do obradoiro e con algunhas das persoas en tratamento que participan nas actividades hortícolas.
Esta colaboración enmárcase nunha relación institucional que se mantén desde 1998, ano no que se asinou o primeiro convenio entre a Consellería do Medio Rural e Proxecto Home Galicia.
Máis de dúas décadas despois, esta cooperación continúa sendo unha vía de apoio aos procesos de recuperación, formación e autonomía das persoas atendidas pola nosa entidade. Desde Proxecto Home Galicia confiamos en que esta relación poida seguir consolidándose e abrir, no futuro, novas liñas de colaboración.
