Concello Coruña Fundación Monte do Gozo convenio

Comparte nas túas redes sociais:

Proxecto Home e o Concello da Coruña asinan un acordo para construir un centro de drogodependentes en Eirís

O Concello da Coruña e a Fundación Monte do Gozo – Proxecto Home asinaron un convenio polo que a entidade sen ánimo de lucro obtén a cesión demanial dunha parcela municipal de 5.538 metros cadrados onde construirá unha instalación para o tratamento de persoas drogodependentes.

Esta iniciativa de Proxecto Home habilitará un inmoble que servirá de centro de día e de longa estancia con 30 prazas de residencia e 60 de carácter ambulatorio.

A leira do Concello está situada nas rúas Inés de Ben e Castiñeiro de Eirís, próximas ao Hospital da Coruña. Segundo o acordo aprobado polo Concello en xuño, a cesión da parcela será por un máximo de 75 anos para que Proxecto Home, con base en Oleiros, conte cunha nova sede. O Concello non esixirá un canon á entidade, xa que a súa finalidade non ten ánimo de lucro.

O convenio foi asinado polo concelleiro de Facenda, José Manuel Lage e o presidente da fundación, Ramón Gómez Crespo. Entre os servizos que Proxecto Home ofrecerá na nova instalación en Eirís para persoas drogodependentes está a terapia para poder deixar as súas adiccións. Na contorna do terreo no que se erixe actualmente a sede da fundación en Oleiros está proxectada a construción de varias edificacións, entre elas, un centro comercial, polo que desde hai meses iniciou os contactos co Concello coruñés para poder contar cunha instalación propia na cidade.

A edil de Benestar Social, Yoya Neira, resaltou “o compromiso” do Goberno local con “os colectivos de persoas que padecen adiccións”, aos que calcula que a administración local axudou con máis de 400.000 euros. Lage destacou o investimento municipal en plans de recuperación e axudas aos servizos sociais, a máis alta, asegurou, entre os concellos de Galicia.

Proxecto Home Galicia, foi escollido para participar no Programa EFQM de Obra Social de Caixa Galicia
Presentación da Memoria de Actividades 2010 de Proxecto Home Galicia-Fundación Monte do Gozo
O Concello de Santiago colabora con Proxecto Home