A directora de Proxecto Home Galicia, Ofelia Debén e o conselleiro de Sanidade en funcións, Julio García Comesaña, asinaron un convenio de colaboración entre o SERGAS e a Fundación Monte do Gozo, para o desenvolvemento do programa terapéutico educativo “Proxecto Home” de atención integral de persoas en risco e con trastornos aditivos e do programa de tratamento e rehabilitación, en réxime de comunidade terapéutica, da dependencia alcohólica.
No acto, que tivo lugar na comunidade terapéutica de Proxecto Home Galicia, emprazada no concello de Val do Dubra, estiveron presentes, tamén, o director xeral de Asistencia Sanitaria do SERGAS, Jorge Aboal, o presidente do Padroado da Fundación Monte do Gozo, Ramón Gómez Crespo, así como o presidente nacional de “ProyectoHombre”, Manuel Muíños.
Na visita ás instalacións da comunidade terapéutica, o conselleiro saudou ao equipo de profesionais asistentes a unha xornada sobre a función de trastornos da personalidade límite nos comportamentos aditivos e ás persoas que están a seguir o seu proceso de rehabilitación e inserción sociolaboral neste centro.
