Os Premios Nécora de Ouro son outorgados anualmente pola Fundación Galega contra o Narcotráfico para recoñecer o meritorio labor desenvolvido por persoas e entidades na loita contra o narcotráfico e as drogodependencias.
Este ano, no Auditorio Municipal de Vilagarcía de Arousa, un destes galardóns concedéuselle a Ramón Gómez Crespo pola súa destacada traxectoria de máis de 34 anos dedicado á rehabilitación e reinserción social de persoas adictas, así como á loita contra as consecuencias devastadoras das drogodependencias na nosa sociedade. Ramón Gómez Crespo foi o fundador en 1990 de Proxecto Home Galicia e o seu director ata 2020. Actualmente segue colaborando coa entidade como Presidente do Padroado da Fundación Monte do Gozo.
Ao longo de máis de tres décadas, Ramón liderou numerosas iniciativas e programas destinados a ofrecer apoio integral a persoas afectadas pola adicción. A súa dedicación incansable, a súa entrega e o seu compromiso inquebrantable influíron decisiva e positivamente na vida de moitas persoas e familias. O seu liderado foi fundamental na implementación de programas innovadores, na sensibilización pública e na promoción de políticas inclusivas e efectivas no ámbito da saúde mental e a prevención de adiccións.
Outras persoas e entidades recibiron a “Nécora de Ouro”:
- Rosa Ana Morán Martínez, Fiscal Xefa da Fiscalía Especial Antidroga. Audiencia Nacional.
- Unidade UDYCOPontevedra, Unidade de Drogas e Crime Organizado. Corpo Nacional de Policía.
- MAOC (N), Centro de Análise e Operacións Marítimas de Narcotráfico, Lisboa.
