Proxecto Home Galicia foi seleccionado como un dos beneficiarios da Convocatoria Solidaria Trezeluzes 2025, unha iniciativa que reflicte o compromiso da Fundación Trezeluzes con proxectos que xeran un impacto social positivo e transformador en Galicia.
Grazas a esta colaboración, poderemos seguir desenvolvendo as nosas accións orientadas á rehabilitación, formación e inserción sociolaboral de persoas en tratamento por problemas de adiccións, contribuíndo a mellorar a súa calidade de vida e fomentando unha sociedade máis inclusiva e solidaria.
O próximo 18 de setembro de 2025 celebrarase a sétima edición do evento solidario Trezeluzes, que terá lugar na Leira Montesqueiro (Oleiros). Durante este encontro, farase entrega oficial da contribución correspondente á convocatoria deste ano e, ao mesmo tempo, recadaranse fondos para a próxima edición. Este evento consolidouse como unha cita imprescindible para a solidariedade en Galicia, reunindo a persoas, entidades e empresas que cren na forza da colaboración para transformar realidades.
Desde Proxecto Home Galicia, agradecemos profundamente á Fundación Trezeluzes pola súa confianza no noso proxecto e pola súa constante implicación en causas sociais que marcan a diferenza.
Grazas polo voso apoio e por camiñar ao noso lado!
