A oitava gala solidaria da Fundación TREZELUZES, celebrada en Finca Montesqueiro, reuniu máis de 400 persoas e recadou 300.000 euros destinados a oito proxectos sociais en Galicia.
A solidariedade cobra sentido cando se transforma en oportunidades para as persoas. Por segundo ano consecutivo, a Fundación TrezeLuzes escolleu Proxecto Home Galicia entre as entidades beneficiarias da súa gala solidaria, renovando unha colaboración que agradecemos profundamente e que contribúe a soster o noso labor de acompañamento a persoas con problemas de adiccións e ás súas familias.
Finca Montesqueiro acolleu a oitava edición deste encontro, que volveu reunir persoas, empresas e entidades comprometidas cunha Galicia máis inclusiva. Máis de 400 asistentes participaron nunha velada que combinou gastronomía, música e compromiso social, cun resultado moi significativo: 300.000 euros para apoiar oito proxectos sociais en Galicia, en ámbitos como a infancia, a saúde mental, a inclusión, o apoio familiar, a educación e a inserción sociolaboral.
Unha cifra que representa un esforzo compartido. Tal e como explicou Lorena Otero, directora da Fundación TrezeLuzes, no programa Voces de A Coruña, de Radio Voz, a recadación foi posible grazas á venda de entradas, ás achegas das empresas que apadriñan a iniciativa e á contribución de Idoneea, anteriormente coñecida como Disashop e impulsora deste encontro solidario.
Detrás dese resultado hai moitas maneiras de colaborar: asistir, achegar recursos, ofrecer tempo, compartir talento ou dar visibilidade ás causas sociais. Todas elas suman e axudan a que as entidades poidamos seguir dando resposta a necesidades concretas.
A gala contou cunha destacada participación de cociñeiros galegos e co apoio de embaixadores como LujánArgüelles, AbrahamCupeiro, María Mera, Fernando Romay, Luis de la Fuente e Luis Piedrahíta, entre outros. As actuacións de Ayman, El Patio, Miguel Sueiras e Musicalmente Eventos acompañaron unha noite na que a celebración e a solidariedade camiñaron da man.
Nesta edición, as entidades beneficiarias foron Fundación Meniños, ENKI, Denis Suárez, Aspanaes, Proxecto Home Galicia, Asociación Española contra el Cáncer de A Coruña, Asanog e Igaxes. Oito iniciativas que traballan en realidades diferentes e que comparten unha mesma vontade: mellorar a vida das persoas e abrir oportunidades alí onde existen maiores dificultades.
Para Proxecto Home Galicia, a continuidade desta colaboración ten un valor especial. Os procesos de recuperación e de inclusión social necesitan tempo, acompañamento e apoios estables. Que a Fundación TrezeLuzes volva confiar no noso labor axuda a dar continuidade a ese traballo e reforza o compromiso compartido coas persoas ás que acompañamos.
Nos nosos centros traballamos desde un modelo educativo-terapéutico e unha perspectiva biopsicosocial. Atendemos a persoa de forma integral, tendo en conta a súa saúde, o seu benestar emocional, as súas relacións familiares e a súa contorna social. O obxectivo é acompañala nun proceso de cambio que lle permita recuperar autonomía e construír un proxecto de vida.
As colaboracións solidarias contribúen a facer posible esa atención. Detrás de cada programa hai historias persoais, familias que necesitan orientación e persoas que se esforzan cada día por avanzar. Por iso, o apoio que recibimos ten un significado moi concreto: contar con máis recursos para seguir estando ao seu carón.
Desde Proxecto Home Galicia queremos expresar o noso agradecemento ao Padroado da Fundación TrezeLuzes, á súa directora, Lorena Otero, e a todo o seu equipo, así como a IDONEEA, ás empresas colaboradoras, aos cociñeiros, artistas, embaixadores e a todas as persoas que participaron nesta oitava edición.